El reto de la desconexión digital.

-¿Qué-y fixisti al guaje?

-¿Por?

-Ta más inquietu que Don Quijote nun parque eólicu.

-Déjalu.

-Probín. Si paez un perru de caza… 

-Na playa nun hai móvil. Y puntu.

-Míralu, nun sabe ónde se va a estrellar.

-Qu’atope otres formes de pasar el tiempu, Loli. 

-Abúrrese, Lolo.

-Meyor. El aburrimientu potencia la imaxinación.

-Pero…

-Nin pero nin manzano, Loli. Na playa nun hai móvil. Acabose.

-¿Y tu?

-Yo toi pendiente de que me llame’l del taller. Si non…

-¡Nun sías cínicu!

-¿Por?

-El guaje yá te vio xubir semeyes a Instagram.

-¿Y qué? Él tien que desempantallase, Loli. Y puntu.

-Non lu veo en condiciones. 

-¿Por?

-Ta tan enganchau a les pantalles que cuando marcha la luz en casa ponse a buscar un cargador.

-Pos que faiga castillos en cuenta de facer scroll.

-¡Ai, probe! ¡Siéntome fatal!

-¿Por?

-Nun sé, someter al neñu a una desconexión dixital… 

-¡Ye una tarde de playa! ¡Trés horinas, namás!

-Ye muncho pa él, demasiao, Lolín. Bonu, y pa ti. 

-¿Pa mi qué?

-Que tamién ye demasiao pa ti.

-Yo uso’l móvil pa temes importantes, nun me compares.

-¡Ai Dios! Tengo mieu de que-y pase algo.

-¿Por?

-Quitar el móvil, asina, de golpe. Nació na era dixital. Y… 

-Ta más enganchau al móvil que les garrapates al nuesu perru.

-Probin, dame pena.

-¿Qué ye, que nun tien amigos?

-Sí, pero tán toos xugando en linea.

-¿N’ónde, ho?

-On line, Lolo, on line. Y el probe neñu abúrrese.

-Que suañe, qu’imaxine, qué sé yo…

-Tien cara rara, como si tuviera escuchando una partida d’axedrez pela radio.

-Al meyor ta creando ¿Qué fixo col llibru?

-Nin miró pa él. Yá lo guardó.

-¿Y el cubu y la paleta?

-Tirómelos a la cabeza.

-Buo. ¡Menuda papeleta!

-Que s’aburra, Loli, qu’aprienda.