Capas de  personalidad que asoman en verano.  

 

-Qué chascu, Sonia. De verdá.

-¿Pero qué esperabes d’un paisanu?

-Chica, yo…

-Vamos ver, Lili, paeces boba.

-¿Por?

-Ligar con borrachos ye como volver de la Feria de Muestras.

-¿Qué, ho?

-Que llegues a casa con coses que nun necesites. Y dices: ¿Qué quiero yo esti bichu agora? ¿Qué lu quiero? ¿Quién me mandó a mi traelu?

-Pero, Sonia, con lo salau que me paeció na verbena…

-Claro, boba, quedasti atraida pola capa esterna.

-¿La qué, ho?

-La teoría de la cebolla, Lili, paeces boba. Yo nun lloro nunca cortando una cebolla. ¿Sabes por qué?

-Non.

-Porque nun establezo nengún vínculo sentimental con ella.

-Yá, coño, pero un paisanu…

-Tienen múltiples capes, boba. Y enriba, en plenu branu…

-¿Qué, ho?

-Son más falsos qu’una patada de culiebra. 

-Nel prau de la fiesta, yera tan simpáticu, tan cariñosu…

-Normal. El rapaz perrea y tu ves la capa esterna.

-Otru día fuimos a la playa y reímonos muncho, charramos de pijadas…

-Les capes entemedies.

-¿Cómo ye, ho?

-Que te cuente la so vida: fracasos, metas, suaños, deseos…

-¿Que qué, ho?

-Si afondes, Lili, llegues al corazón.

-¿Del rapaz?

-Non, boba, de la cebolla. Ves lo que taba debaxo, la esencia. Y daste cuenta.

-¿De qué, Soni?

-¡De que nun hai con quien tratar! 

-Ai, Lili….

-De que debaxo de les rises y el vientre planu nun hai na, pero na de na.

-Ye verdá.

-Claro, boba, nin empatía, nin sinceridá, na. Entós daste cuenta de que’l chaval ye como’l branu.

-¿Caliente?

-Non, sin clase.

-Ah. Yá. Dichosa cebolla, fía.

-Una cosa ye lo que muestren al mundu y otra lo que guarden nel interior.

-¡Hai de too, eh! ¡Hai de too!

-Selo yo. Pero agora mira, la que tas disgustada por esi oveya yes tu.

-Yá. ¡Vaya chascu!   

-Asina que fai’l favor, eh.

-¿Qué, ho?

-Nun te disgustes. 

-Ye que tien más cara, fía, qu’un sacu de muñecos. Yo toi… toi…

-Tranqui, nena. Todes lloramos por una cebolla que nun merez la pena.