Bicoca para los amantes del deporte televisado.
-¡Menudu par de meses, mama!
-Julito, fíu…
-D’equí nin muevo.
-Llevanta’l culu, faime’l favor.
-Sí, ho. Col veranín que m’espera…
-¿Por?
-El Playoff d’ascensu xúntaseme cola Eurocopa.
-¿La qué, ho?
-Voi tar liau hasta’l catorce de xunetu. Y dos selmanes dempués…
-¿Qué?
-Arranquen los Xuegos Olímpicos de París.
-¿Que qué, ho?
-Hasta’l 11 d’agostu, mama.
-¿Y nun vienes pa La Vecilla con papa y conmigo?
-¿Cómo voi dir, ma? Yá vamos tar en primera y tengo la pretemporá.
-¿La qué, ho?
-Partíos amistosos, lliga, y vuelta empezar.
-¿Pero, Julito, de verdá nun pienses mover el culu d’esti putu sofá?
-Ye lo qu’hai, mama.
-¿Pero tu sabes qué supon eso?
-Mmmm… 51 partíos del européu, 400 hores de los Xuegos de París…
-¿Sabes cuántes pizzas, cerveces, hamburgueses, patatines, tienes per delantre?
-Normal, mama. Con tantu esfuerzu, con tantu entrenamientu…
-¿Esfuerzu?
-Ver un partíu de fútbol equival a 90 minutos de caminada rápida siempres que se viva con intensidá.
-¿Quién lo dixo?
-Una investigación de la Universidá de Leeds. ¡Cuidadín, eh, cuidadín!
-¿Cómo ye, ho?
-Un gol, mama, dispara un 24% les pulsaciones.
-¿Y?
-Coime, toi faciendo ‘cardio’ pero equí sentadín y col mandu a distancia.
-Lo que tas faciendo ye’l animal.
-¿Por?
-Que yá tienes trenta y seis años, y nunca disti un palu a l’agua. ¡Oveya!
-Non te pases, mama. Qu’esto ye mano de santu.
-Sí, ho…
-Llibérense endorfines, fortalezse’l sistema inmunolóxicu, déxame desconectar del estrés diariu…
-¡Tas tu bien estresau, castrón!
-Y refuércense los vínculos sociales.
-¿Qué vínculos, Julito? Si te zarres tu solo equí, nel sofá.
-Que non, mama, que somos mogollón.
-¿Ónde, ho?
-En whatsapp. Tengo grupos asgaya, esto ye un nun parar…
-¡La madre que te siblo! Tengo una gana de qu’atopes trabayu y te pires de casa
-Esto ameyora l’estáu d’ánimu y los circuitos cerebrales del placer. El celebru..
-¿Qué celebru, Julito? Si tienes menos celebru qu’una estrella de mar.
-Tu dexame la nevera llena que pienso pasame dos meses esfrutando…
-¿Pero de qué, ho
-Del ascensu, mama, y del televerano.
