Síndrome del retraso crónico.
-¡Menuda falta de respetu!
-Nun ye eso, Lili.
-Home, non.
-Hai factores sociales, psicolóxicos y hasta cerebrales que…
-¿Cómo ye, ho?
-Tengo unes neurones nel hipocampu que m’aburuyen la percepción del tiempu…
-¿De qué vas, de Ramírez? ¿Vas de Ramírez pola vida?
-Non, cielu, pero… Ye que… Tengo saturá la memoria de trabayu.
-¿La qué, ho?
-La memoria operativa, vida.
-¿Saturá de qué, ho?
-De pijaes, pensamientos innecesarios, qué sé yo… Fállame’l cálculu mental.
-¡Yes incapaz de ser puntual! ¡Incapaz!
-Claro. Ente’l déficit d’atención, la personalidá compulsiva…
-¡Qué morro tienes!
-Intento facer más de lo que’l tiempu me permite y dexalo tou pal últimu momentu….
-¡Calla! ¡Tardón de los coyones!
-Nun me da la vida, Lili, nun me da.
-Qué falta de respetu.
-Lilina, cuando me llamasti taba saliendo…
-¡Mentirosu! Tabes na cama… ¡Anda, que tienes unos güevazos!
-Vengo al mio ritmu, vida…
-Yes más lentu qu’un caracol con asma.
-¿Y qué quies que faiga?
-La puntualidá ye una actitú, Jaime.
-Nun me da la vida, ando fatal de tiempu.
-Nun ye falta de tiempu, ye falta de respetu.
-Qué pesadina, fía.
-¿Pesada yo?
-Sí. Díxite: toi en cinco minutos, nun fai falta que me llames cada media hora.
-Flipo. Yo nun puedo, Jaime.
-¿El qué?
-Nun puedo siguir con daquién que me fai perder el tiempu.
-Meca, peor ye lo mío. ¡El tiempu, Lili, piérdeme a mi!
-¿Que qué, ho?
-Acumulo curro, nun centro, procrastino, llego nel últimu momentu…
-Yá, yá. El síndrome del retrasu crónicu, nun me digas más.
-¿Qué?
-Te pon, Jaime. Llegar tarde te pon, tío, ¡siempres faes igual!
-¿Qué dices?
-Sientes un xubidón d’adrenalina énte la idea de retrasate. Di la verdá.
-Calla, ho.
-Que sí, Jaime, ye adictivo. Por eso nun lo ves como irresponsabilidá. Porque para ti ye una forma de vida. Ye horrible, chaval.
-Peor ye lo tuyo.
-¿Lo mío?
-Sí, ¿de qué te sirve ser siempre puntual? ¿Eh? ¿De qué te val?
-Llego siempre a la hora. Siempre.
-Yá. ¿Y? ¿De qué te val llegar la primera si nunca hai naide p’aprecialo?
