Un nutricionista en la familia.

-¡Oyeeee! ¡Ponme otru vinín!

-Yá lleves dos, tito.

-¿Y?

-240 caloríes. Más les dos cerveces: 480. 

-¿Qué dices, guaje? ¡Tu qué vas saber!

-Home, si hai 7 caloríes nun gramu d’alcohol, basta con saber cuántos gramos d’alcohol tien una bebida y multiplicalo por 7.

-¿Pero a qué vienes equí? ¿A tomar el aperitivo col to tíu o a echar cuentes?

-¿Aperitivo? Pero, tito, si nun paras de tragar…

-¿Yo?

-Chocolate, pizza, cerveza, xelaos, gominolas…

-¿Nun dices que somos lo que comemos?

-Sí.

-Entós, ¡soi deliciosu!

-¡Buo! Lo que yes, tio, ye un inconsciente.

-¿Por?

-¿Sabes lo que son  les caloríes?

-Sí, ho. Son unes fíes de puta que se meten nel mio armariu de nueche y me encogen la ropa.

-Pero tito…

-¡Tengo l’armariu infestáu!

-Dexate de coñes y piensa nel conteníu nutricional del alcohol.

-¿Que qué, ho?

-¡Son caloríes vacíes! Y entós…

-¿Quies callar, ho? ¡Yes más pesáu qu’un sordu con un tambor!

-Tito, yo…

-¡Ni tito ni hosties! ¡Ye domingo, Jose Emilio!

 -¿Y qué?

-¡Los domingos les caloríes nun cuenten!

-Sí, ho. Tas guapu…

-Selo yo.

-Tienes que facer exerciciu y nun desdexar la dieta. A lo menos, cinco manzanes diaries.

-¿Verdes o coloraes?

-Corriendo, tito. ¡Corriendo!

-¿Cómo ye, ho?

-Tienes que correr unes manzanes al pie de casa toles mañanes.

-Correr ye de cobardes, Josín.

-Tienes que tomartelo en serio.

-¿El vino? Sí, ho. En cuanto me lu traigan.

-Siempres te quexes del sobrepesu y nunca faes nada. 

-¡Cómo que non!

-¿Alguna vez quemasti más de mil caloríes?

-Sí. Una vez que olvidé la pizza nel fornu.

-Jobar, tío, nun puedo contigo. 

-Pos anda que yo…

-Y enriba, les botelles ensin etiqueta nutricional.

-¿Quies callar? ¿Pídote un cacharru?

-Nin de coña. Los cócteles con refrescos azucarados son lo peor.

-¡Cagonrós! Recuerdame que -y de un par de hosties al mio hermanu.

-¿A mi pá? ¿Por qué, ho?

-Por obligate a estudiar Nutrición.