Modelos de crianza y chipirones afogaos.

-Perdone, ¿son ustedes los padres d’aquel rapacín?

-Sí, ¿por?

-Mire, ye que ta molestando a otros clientes y…

-¿Molestando? ¿Por?

-Acaba de da-y una patada a la mesa, tiró-yos un platu, ta pellizcando…

-Na. Son formes de ser. 

-Pero…

-Tien cinco añinos, ¿qué quies?

-Oiga, esi críu ye un polvorín. 

-Na. Ye un pocu nórdicu, ahí onde lu ves.

-¿Nórdicu?

-Sí, ho. Los neños nórdicos van solos al colexu dende pequeños, xueguen na cai ensin supervisión, preparen la cena…

-¡Qu’el so fíu ta molestando a los de la terraza, oiga!

-Qué va, home, qué va. Ye la so manera d’entender la vida en sociedá.

-¿Y ustedes se faen los suecos?

-Suecos non, noruegos.

-¿Cómo diz?

-Ye otru modelu de crianza, bobu. Somos…

-¿Noruegos?

-Non. Ser somos de Sariegu, pero tenemos una filosofía educativa que…

-¡¡¡Lo que tenéis ye unos güevazos!!!

-Traiganos otra de chipirones afogaos y una botellina de sidra.

-¿Pero nun ven qu’el so fíu ta metiéndose ente les meses, dando voces y…?

-La crianza en llibertá ye lo que tien.

-¿Que qué, ho?

-Xugar na cai, esperimentar…

-Flipo, de verdá. ¿Pero nun ven la que ta liando el guaje?

-Lo que nun podemos ye ser su apagafuegos. Eso xenéra-y inseguridá. 

-¿Que qué, ho?

-Tienen qu’aprender a facer les coses por sí mesmu, a solucionar los sos problemes. 

-El problema non ye el fíu, ¡el problema son los padres!

-Ande, ande, siga trabayando, que ta usté sin civilizar.

-¿Yo?

-Sí, home, sí. Hai que viaxar más, movese pelos países nórdicos…

-¿Pero qué países nin qué mi madre? ¡Faltosos!

-Chipirones afogaos y una de sidra, faiga’l favor.

-¡Que tenéis al guaje tiráu nel suelu!

-Que se levante. Hai qu’enseñalos a llevantase, nun evita-yos les cayíes.

-Los tenéis cuadraos, eh.

-¿Por?

-Lo que nun se puede ye soltar al guaje na terraza d’una sidrería como si esto fuera un parque infantil. 

-El nenu yá ta pa relacionase colos demás.

-Cualquier día vamos tener un disgusto, verás.

-Naaaa. Habiendo chipirones nun pasa naaaaaa.