La cuesta de la vida

Típico bloqueo del mes de enero.

-¿Qué tien de menú, ho?

-Tenemos trés primeros y trés segundos pa escoyer.

-¡Mierda!

-¿Perdón?

-En trés segundos nun me da tiempu a decidime. 

-¿Eh?

-Toi confusu, tamos a primeros d’añu y…

-¿Qué, ho?

-Acabo d’estrenar la mi hoja de ruta personal.

-¿Que qué, ho?

-Nuevos propósitos, lo que voi comer, cómo voi pensar, talentos que quiero desenvolver, iniciatives que voi consolidar…

-Sopa, cocíu de garbanzos o paella.

-¿Pa… pa cuándo?

-Y chuleta, merluza o pitu, de segundu.

-Nun sé. Y si quedo con fame…

-Puede repitir.

-Nun sé. Y si quedo con fame…

-¿Usté qué quier, quedase conmigo?

-Nun sé, toi duldando. Tampoco nos conocemos tanto.

-¿Pero qué coyones-y pasa? ¿Qué ye lo qu’usté quier?

-Endelgazar, faer deporte, aprender dalgún idioma, lleer más, dexar de fumar…

-¿Qué, ho?

-Un cambéu significativu del mio estilu de vida. 

-Mire, la carne tien bona pinta y…

-Ye finita.

-¿La chuleta?

-Non, la vida, puede terminar en cualesquier momentu, hai que saber escoyer.

-¡Pos decídase d’una puñetera vez! ¡Que tengo más meses qu’atender!

-Llevo dende’l primeru d’añu cavilgando.

-¿Eh?

-Dexóme la mio muyer, una selmana fui vegano, otra belenista, unos díes non binariu… 

-¡Buo! ¡Ta usté como les maraques de Machín!

-Acábase’l primer mes del añu y agora toi recalculando… 

-¿El qué, ho?

-Los mios oxetivos, cómo enllenar esta fueya en blancu…

-¿Quier la carta?

-Yá la escribí, téngola en casa.

-¿Cómo ye, ho?

-Escribime a mi mesmu pa reconciliame un pocu col mio mundu emocional.

-¡Wooo, chaval!

-¿Qué ye?

-Ta usté más despistáu que Spiderman nun descampao.

-Selo yo. El típicu bloquéu de xineru.

-¿Entós qué? ¿Sopa, cocíu o paella?

-¡Qué sé yo! Tengo que ver la mio fueya de ruta, la mio brúxula interior.

-Una hostia a tiempu…

-¿Qué, ho?

-¡O se desbloquia usté o lu desbloquio yo!

-¡Oi! ¿El pitu vien solu?

-Non, mamón, yá te lu traigo yo.