Propósitos de año nuevo.

-¿Pero puede sabese qué faes, Gustavo?

-Ye llunes, Mari, güei tócame pierna.

-Coime, y a mi.

-¿Nel gym?

-Non, nel hombro. ¿Lo pilles?

-¿Eh?

-Venga, anda, voi poneme’l saltu de cama y aprovechamos primero que lleguen los nenos.

-Ye que…

-¿Qué ye? ¿Nun quedamos n’aumentar la frecuencia de la nuesa actividá sexual?

-Sí, home, pero…

-Alcuérdate, brindamos per un nuevu añu más placenteru.

-Yá, pero…

-Pedí al nuevu añu que me deseyares tantu como yo te deseo.

-¿Y yo qué te dixi?  ¡Pide salú, nun sías tonta! 

-Venga, Gus, déxate llevar polos instintos de vez en cuando.

-Agora vienme fatal, Mari, tengo que flexionar.

-¡Cagonrós! ¡Pos vete a pañar bolines a Xagó, cabrón!

-¿Que qué, ho?

-Tanto facer la llista de los propósitos, tanto prometer pal nuevu añu…

-Tranqui, ho. L’añu ta empezando…

-Quedamos n’esfrutar xuntos, en dar y recibir placer .

-¿Traxístime lleche de soja?

-¡Traxi mierda pa ti!

-Vaya, ho.

-Tol mundu ta esfrutando a tope del sexu y nós…

-Bonu, a ver, tampoco creas… 

-L’añu ye nuevu pero la floxera ye la mesma.

-Tranqui, Mari, yá va haber más díes.

-Non dexes para mañana lo que puedas facer güei.

-Por eso te digo.

-¿Entós?

-Toi con una rutina de cardio, Mari.

-¿Por qué nun quies tener sexo?

-Sexo yá tengo, Mari. Otra cosa ye que lo use más o menos.

-Yes más fríu que’l culu d’un pingüín.

-Los crios salen agora de clase particular, van tar al llegar.

-Mira, cachitas, toi empezando a sentir una distancia emocional terrible.

-Non ye tan fácil cumplir lo que se promete para l’añu nuevu, Mari.

-Yá lo veo, yá.

-Tamos a mediaos de xineru y quiero tar contigo’l restu de la mio vida.

-A mi nun m’amenaces, Gus.

-¿Qué?

-Que nun m’amenaces.

-¿Por?

-Yes más problemáticu que Hipólito.

-¿Quién ye Hipólito?

-La borrasca, oveya. Vivir contigo ye como tener una Dana en casa.

-Dexa les bolses, anda.

– ¿Pero y lo que falamos? ¿Y los nuesos propósitos d’añu nuevu?

-¡Tranqui, ho! Yá vamos atopar el momentu, yá va haber tiempu…