Secuelas del Mundial de Fútbol 2026
-¡Vamos, Severino!
-Pausa d’hidratación.
-What what, ho?
-Les regles son les regles, Maricruz.
-No te pares, que depués ye peor.
-Sí, ho. ¿Vas saber tu más que la FIFA?
-Severino, fai’l favor.
-¡Nun puedo llevar un ritmu tan alto, Mari! ¿Nun ves que voi resoplando como un acordión rotu? ¡Toi agotau!
-¿Agotau de qué? ¿de ver escaparates?
-Canso yo más contigo entrando y saliendo del probador que Cucurella detrás del estremu de Arabia…
-¡Solo llevamos un cuartu d’hora caminando!
-Sí, amor, pero tu yes más intensa que la Selección de Japón.
-What what, ho?
-Que si vamos mirar una cosina, pruébate esto, y agora aquello y lo de más allá..
-¡Seve, por favor!
-¿Tu sabes lo que ye tener que responder quinientes veces a cuál te gusta más?
-¡Ja! Encima que te pido opinión…
-¡Tengo hasta calambres de sostenete’l bolsu!
-Anda, déjate de rollos.
-¡Pa rollos los tuyos, que tires media hora charrando con cada dependienta sobre un jerséi! ¡Y nun entiendo nada de lo que dices!
-¿El qué nun entiendes, corazón?
-Beige arenina, blancu rotu, verde salvia, gris piedra, azul sufridín… ¿Qué mi madre ye eso? ¿L’aliniación de Curazao?
-¡Vamos! ¡Tu al chigre nun entres, yá te lo digo!
-Necesito recuperar electrolitos.
-¿Desde cuándo la sidra lleva electrolitos?
-Yo voi quedame equí, esperando en bloque bajo, como Cabo Verde.
-¿Esperando’l qué?
-Véote a la vuelta, vida, cuando salgas de Salesas…
-¡D’eso nada! ¡Venga!
-Hai que gestionar esfuerzos, ¿oíste?
-¿Qué esfuerzos?
-Los que tán por venir, que te conozco.
-How are you, ho?
-Vamos correr la Cai Uría trés o cuatro veces, vas meteme en Zara, Mango, El Corte Inglés. Y depués vas llevame arrastro hasta Los Prados…
-Lo que surja, Severino.
-Selo yo. Por eso te digo: Pausa d’hidratación.
-¡Vamos!
-Mira, Mari, o tomo un cacharru o….
-¡Vamos dar un paseín, nun sías bobu!
-Como vuelva entrar y salir d’un probador va dame una luxación.
-A what, ho?
-A mi nun me respeten les lesiones, Mari, y llevo munchos partíos enriba.
-¡Lo que lleves ye una empanada cojonuda! ¡Tantu fútbol y tantu!
-Un momentín, Mari. Te lo pido por favor.
-What, ho?
-Pausa, vida. Pausa d’hidratación.
