Elogio del buen paisano.
-¡Camina, Tino! ¿Qué mires, ho?
-Los árboles, Jose Luis. Ye lo guapo de venir de monte. Que miro los árboles y lo veo todo claro.
-¿Todo? ¿El qué?
-La vida, tío. La mio vida, ¿sabes cómo te digo?
-¿Cómo ye, ho?
-Na mio vida, Josín, tuvi muncha “xente fueya”. Foyaraca, como dicía’l mio güelu.
-¿Eh?
-Xente como les fueyes, que se van cuando sopla un poco de vientu.
-Ah.
-Pero tamién tuvi “xente caña”, cuidao.
-¿”Xente caña”?
-Sí, Josín. Amistaes, como les cañes, les rames, qu’acaben rompiendo cuando la vida vuélvese más dura.
-¿Diceslo por mi, Tinín?
-Non. ¿Sabes por qué?
-¿Por?
-Porque tú yes raigañu, Jose Luis. Yes una “persona raíz”.
-¿Raíz?
-Sí. Les que se queden y te sostienen nos momentos más difíciles.
-¡Cagonrós! Yo…
-Yes un amigu verdaderu, que tuvisti conmigo a lo llargo de los años aguantándome’l tirón…
-Bueno, home. Yo…
-Tu dexasti na mio cabeza una huella indeleble.
-¿Los cuernos?
-Non, coño, nun me refiero a eso. Eso ye agua pasada.
-A ver, Tino. Mari taba contigo. Y yo… Oi, un calentón
-Eso foi en primeru de BUP, home. Yá pasó.
-¿Cómo diba a saber yo que Mari salía colos dos?
-Yes auténticu, Josín. sin dobleces.
-Jobar, Tino, vas sacame los colores.
-Escucha: gracies a ti convertíme na persona que soi.
-Sí, ho. Agora voi tener la culpa yo.
-¡Non, fuera pijaes! ¡Ayudástime a crecer como persona!
-¡Jobar, Tino, siempres que venimos de monte poneste metafísicu!
-¿Qué quiés? La seronda, los árboles, la edá…
-¡Camina, ho!
-Espera, coño, ye que miro los árboles y dame por pensar.
-Yá lo veo, yá.
-Los amigos, Jose Luis, son como los zapatos.
-¿Cómo ye, ho?
-Puedes tener munchos pero siempres andes colos que te sientes más a gusto.
-Ai, amigu…
-Tu y yo pensamos distinto, nun compartimos nin gustos políticos, musicales, nin siquier equipu de fútbol. Pero llevamos tola vida xuntos, dende guajes.
-Y mira que fiximos putaes l’unu al otru, eh.
-Tamién ye verdá. Cagamosla, y nun pasa nada, sabemos perdonar.
-Camina, Tinín.
-Nin fueyes, nin caña, Jose Luis. Yes auténticu: una “persona raíz”.
