Paqui puente

El drama de las “personas taller”.

-¡Mira, Mari, qué manguán!

-Paez otru, eh.

-Seis meses xuntos y nin un abrazu. Y agora…

-Nun y-des más vueltes, Paqui. Fuisti una persona puente.

-¿Cómo ye?

-Una chica taller. 

-¿Quién? ¿Yo?

-Reformasti a un home tóxicu y preparástelu pa ser feliz na so siguiente relación.

-¡La madre que lu sibló! Él agora, cola otra, ta como unes castañueles. Y yo…

-Tranqui, Paqui. Non te disgustes.

-Y ella paez lloca de contenta.

-Normal. Gracies a ti ta esfrutando d’una versión mejorada de Josepín.

-Yo fixi’l trabayu suciu, ¡cagonrós!

-A mi con Fonso pasóme igual, val más nun lo pensar. 

-Yá, pero…

-Somos persones puente, fía. Nosotres pasamoslos pol taller y…

-Si hasta paez bona persona, el cabrón.

-Gracies a ti, boba. Les coses como son.

-Diz qu’agora ye fiel.

-Pues a ti púnxote los cuernos por tolos llaos. 

-Yo fui boba del too.

-Non, muyer, tu fuiste la pasarela emocional.

-¿La qué, ho? ¡Lo que yo pasé por Josepín…! ¡Y mira p’ahí!

-Tuvistis una relación más dura qu’un turrón d’ufierta.

-Y tengo mieu que yá tuviera con ella.

-Calla, ho.

-Home, Mari, dexome y a los trés díes yá salió cola otra en facebook.

-¡Como Fonso! ¡Igual! Y conmigo nun ponía nin una puñetera semeya.

-Agora, dígote una cosa: ella ye bien ruinuca, eh.

-Allá él.

-¡Tu míralu! Afeitose, baxó la barriga y agora hasta sale a correr.

-Gracies a ti, Paqui. Ayudástelu a pasar d’una etapa de la so vida a otra.

-Amás de verdá.

-Enseñásti-y tolo que ye, nun sabía nin llimpiase los mocos, nin vistir bien, nin..

-Yá, yá. ¿Y a mi eso quién me lo paga, ho?

-¡Que cargue la otra con él!

-Yá, pero dame rabia, chica. Menuda frustración. Colo que me fixo sudar, el cabrón…

-¡Vente enriba, Paquita! ¡Tú vales más qu’ella con un cachu! ¿Oíste? 

-Nun sé…

-¡Home vaaaa! Nun tienes nada qu’envidiar nin a la fuina esa nin a nenguna de les princeses de Disney.

-Fía, yo…

-Dígotelo como lo siento.

-La rabia que me da ye tol tiempu y l’enerxía que dediqué en reformar a esi elemento. El Josepín de los coyones…

-Selo yo, Paqui. Selo yo.

-El probe na cama taba más perdíu qu’un daltónicu faciendo’l cubu de Rubik.

-¡Puag! Estos paisanos… Yo yá paso, ¿oíste?

-¡Y yo! Acabose, Mari. ¿Sabes qué? ¡Cierro’l taller!