El plan B.
-¿Te echó Tere de casa, ho?
-Yá ves.
-¿Entós?
-La tensión de tol branu, los cuernos, la rutina, qué sé yo…
-¡Meca! ¿Y agora?
-Na. Hai que tener una actitú combativa y optimista, Jose Ramón.
-Probe.
-¿Quién? ¿Yo? ¿Qué dices? Nada de autocompasión. hai que ponese les piles.
-Pero…
-Cuando’l tren de la rutina descarrila…
-¿Qué faes?
-Hai qu’abrazar el plan B.
-¿Quiés parar d’una vez cola axenda del móvil?
-Bárbara… Bea… Belén…
-¿Vas llamales a toes? ¿Por qué?
-Por orde alfabéticu, dalguna tien que…
-Flipo. Acabes de salir pela puerta y…
-Toa salida ye una entrada a otra parte. A ver: Bárbara… Begoña…Beyoncé…
-Meca. ¿Tienes el teléfonu de Beyoncé?
-Sí, bonu…Ye una chavala de Belmonte que canta perbién.
-Alucino contigo, Silvino. En serio te lo digo.
-¿Qué quiés? Si falla’l plan A…
-Reláxate, ho. Vas tener que pasar el duelu.
-Na. Cuando surde la crisis, hai qu’actuar con rapidez.
-Tas aventau, dígotelo en serio.
-Convien tener a mano un nuevu rumbo na nuesa carta.
-¿Qué carta, ho?
-La carta de navegación, Jose Ramón. Necesito otra compañera de vida.
-¿Qué ye, que nun sabes tar solu?
-¿En pleno San Mateo?
-¡Meee! Yes un picaflor, tas ansiosu… Vete a duchate y a dexar les maletes.
-¡Calla ho! ¡Habrá que quedar!
-¿En casa?
-Non, coño, quedar con dalguna, quién sía…
-¡Uf! Tas en pleno “crash emocional”.
-¿Y qué?
-Pos eso, que tienes de tar sufriendo y…
-Na. El dolor ye inevitable, el sufrimientu ye opcional.
-¿Por qué non fales con Tere? Igual se arrepiente.
-Non me pienso agobiar, Jose.
-Dexa’l teléfonu en paz.
-La ocasión hai que creala, nun esperar a que llegue. Tien razón el chino.
-¿Qué chino?
-Si te caes siete veces, llevántate ocho. Ye un proverbiu chino.
-¿Pero nun queríes a Tere? ¿Por qué vas cambiar?
-Tamién quixi a Motos y cambielu por Broncano.
-¿Cómo ye?
-Cuando’l tren de la rutina descarrila…
-¿Qué?
-Hai qu’abrazar el plan B.
