Cuidadoras.
-¡Tanta empatía y tantu cuentu!
-Chica, yo…
-Tienes que poner límites, Mariflor. Aprende a decir no.
-Yá, boba, pero él…
-¡Que solucione sus problemas! Siempre igual, yá valió.
-¿De qué, ho?
-D’asumir el rol de salvadora nes tos relaciones, cojona.
-Fía, yo…
-¿Cuántu fai que nun vamos al cine, al teatru o a…?
-Yá, pero…
-¿Cuándo saques tiempu pa ti mesma?
-¿Qué quies que faiga?
-¡Faite cargu de tu vida, Florina!
-A ver, ye que…
-Nun saques una tarde nin pa dir a la peluquería.
-Él diz qu’anda pachuchu, ¿oíste?
-Sí, ho. Pa salir de chigres o dir a los partíos, pa eso no. ¡Descuida!
-Yá, home, pero…
-No yes una ONG, guapina. Y él tontu nun ye.
-¿Por?
-¡Yá te tien tomada la medida! ¡Ta infantilizau!
-Bah, siempre fue un guajón.
-Yá, boba, pero tien 62.
-Ye malu pa él.
-Ta acostumbráu a que tu-y saques les castañes del fueu.
-Tamién ye verdá.
-Él disfruta más qu’un gochu nun charcu. Ye un comodón.
-Probe…
-¿Probe? ¡Probe tú, Mariflor!
-Mira, Fátima, yo…
-Nun tienes remediu, fía, siempre faes igual. Para yá.
-¿De qué, ho?
-De poner les necesidaes de los demás per delantre de les tuyes. El puñeteru Síndrome del Salvador.
-¿El qué, ho?
-Y lo peor ye que siempre nos pasa a les muyeres. El dichosu rol de cuidadores que la sociedá nos…
-¡Para, para! ¡Nun me sueltes mítines, Fátima!
-Ye que hai que decitelo, Mariflor.
-¿Y tú? ¿Por qué dejaste tu de trabayar?
-Vaya…
-¿A qué te dediques mañana y tarde?
-Vaya, ho…
-¡A ti te pasa igual! ¡O peor!
-Bueno, yo…
-Tola vida cuidando de los demás. Y vas y me riñes a mí.
-Duelme la cabeza.
-Y a mí.
-¿Vamos al cine?
-¿Qué?
-¿Vamos al cine?
-Venga.
