Luces de la ciudad

Gente entre bombillas.

-¿Visti qué guapo, cari? Y nun queríes salir…

-¡Pfff! Tou llenu de xente, detrás de les bombilles como oveyes…

-¡La lluz mata los vampiros, Balbino!

-Yá. Y el recibu a los humanos.

-¿Qué dices, ho?

-Qu’esto lo pagamos toos.

-Yá tamos…

-Sí, chiflando.

-¿Qué?

-Que tamos chiflando, Mari. Esto se nos va de les manos.

-¡Pos ta bien guapo! ¡Y la xente encantao!

-Porque tamos como oveyes.

-Yá salió’l llistu…

-¿Sabíes que l’escesu de lluz artificial perxudica a un gran númberu d’animales nocturnos?

-¿Qué lo dices pol mio sobrín?

-Non, Mari, el 30% de los vertebraos y el 60% de los invertebraos son nocherniegos. Y con esta contaminación llumínica…

-¡Ai, fíu, como te gusta poner pegues a tou!

-¿Qué ye, qu’a ti te da igual l’aumentu del consumu enerxéticu y andar fadiando a la biodiversidá?

-Yo  quiero dar un paseín pel centru y mirar el pantalonín de pana pa la cría…

-Yá, Mari. Pero a mi tanta lucecina yá me ta poniendo de mala hostia.

-¡Menudu Grinch tas fechu!

-¿Yo?

-Sí, Balbino, qué raru yes. ¡Yes más raru que ver a los mormones de 3 en 3!

-¿Pero a ti paezte normal esta llocura llumínica, ho?

-A ver, qu’esto tampoco ye Vigo.

-Da-yos tiempu, ¿oíste?

-Ai, calla, ho.

-Los alcaldes tan en plenu derbi de guirlandes, arbolinos, estrellonas y la de mi madre. ¡Esto ye un nun parar!

-¿Y a ti qué más te da?

-Tanto cuentu cola Transición Ecolóxica y…

-Ai, Balbino, nun sías pesadín.

-Claro, Mari, solo pienses en ti.

-¿En mi?  

-Sí, Mari, sí. ¿Y les especies silvestres que viven nes ciudaes? Ye bien cómodu andar perhí xingando ecosistemes…

-Solo quería sacate un poco de casa y mercar el pantalón de pana de la guaja. 

-¿Quies crees qu’a mi tanta lucecina yá me ta alteriando’l mio reló biolóxicu?

-Ai, Balbino, por favor…

-Duermo mal, como peor, faigo mal la dixestión…

-¿Por estes lluces, ho?

-Y los villancicos, Mari. La contaminación acústico y llumínico afecta al suañu, la regulación hormonal y la capacidá d’orientación de los Alvia y de les aves.

-¡Anda, calla, y dexa de dame la tabarra!

-Hai qu’amenorgar el consumu de lluz n’espacios públicos, Mari.

-Pesadín yes, fíu. Esto nun ye Vigo.

-Da-yos tiempu, ¿oíste? Tu da-yos tiempu.