El peor dato de emancipación en 130 años.

-Cola ilusión que nos facía ver al nenu independizáu…

-…Dir visitalo un domingu, lleva-y un tupper, critica-y les cortines…

-Ahí lu tienes: ¡53 años y non gurguta! 

-Ta faciendo números, el probe.

-Guerra nun da nenguna, la verdá.  

-Da penina.Tola vida trabayando. Y míralu… 

-Aquí en medio, como una croqueta humana, atrapáu ente dos jubilaciones.

-Un día pienses “¡qué rápido crecen!” y al siguiente veslu nel sofá y dices: ¡hostia, ta avieyando con nosotros y sin parar de trabayar…!

-Ye qu’antes trabayar sirvía pa ahorrar.

-Agora trabayes y… sobrevives.

-Sí, ho. Trabayes pa pagar l’abonu trasporte que te lleva al trabayu onde trabayes pa pagar l’abonu trasporte.

-Economía circular.

-Jobar. La idea yera…

-…Que se largara, ficiera su vida y viniera los domingos a comer. Pero…

-A esti nun lo sacamos d’equí nin con agua ferviendo.

-¡Buo! Col preciu que tien agora la vivienda…

-El probe intentalo, la verdá.

-Sí. Esti día abrió una app de pisos y a los diez minutos taba mirando documentales de lobos. 

-¿Por?

-Ciscáben-y mil euros por un pisu de trenta metros con humedá y una cocina diseñá por alguien qu’odia cocinar.

-¿Y el pisu que ponía “ideal pa una persona”?

-Imposibe metese ellí. Si respires fuerte yá ocupes demasiao espaciu.

-Jobar. Pos yo, a la so edá, tenía casa, trabayu fiju y un Renault 5.

-Agora compartimos tou: hasta la contraseña del Wi-Fi.

-Míralo, qué agotamientu lleva enriba.

-Ye que vivir colos padres a los cincuenta y picu tamién cansa, eh.

-Dimelo a mi, que toi farta de cocinar y poner lavadores…

-Bueno, anda, polo menos fainos compañía.

-Eso sí. Y cambia les bombilles cuando se funden.

-Y sabe poner Netflix. 

-Yá nun tenemos un fíu, tenemos un serviciu técnicu con contratu indefiníu.

-¿Tú crees que algún día marchará de casa? ¡Ta buscando pareja!

-Non, Teresina, lo que busca ye alguien con pisu.

-¡Qué románticu, salió al padre!

-El sino de los tiempos. Yá nun se diz “te quiero”. Dizse: “¿Tienes alquiler antiguo?”.

-Na. Pa independizate tienes que vender un riñón. 

-O dos. Menos mal que cuando faltemos nosotros va heredar la casa.

-¡Y les deudes! El probe tien mucho matu.

-Ya, eh. ¡Vaya telar! Yá tenía que tar trayéndonos los nietos y…

-Bastante fai con traer yogures del súper cuando tán de oferta.

-Bueno, muyer, igual cualquier día arréglase lo de la vivienda.

-Sí, ho. Siéntate y espera.