La fauna veraneante.

-¡Ahí tán! ¿Nun los oyes? Centraos nel so soníu favoritu.

-¿Cuál? ¿El cantar del gallu?

-El clic de la cámara, Rufino. Y de los puñeteros móviles.

-Yà. Esti día había cola pa sacar semeyes col grifu del lavaderu.

-Tán apijotaos mirando cada tractor como si fuera un monumentu históricu.

-Na, Paco. El turisteo rural va cambianos la vida. Sobremanera a Rosalia.

-¿La cantante?

-¡La mi vaca, ho! Ye una celebridá digital. Tien más likes que Vinicius.

-¿Pero por qué-yos dará por abrazar vaques?

-Porque si nun hai vaca, nun hai hestoria en Instagram.

-Y nun los visti correr detrás del gallu glayando ¡Selfie! ¡Selfie!

-Sí, ho. Y un rapaz intentando “atrapar” el arcoíris con bolses de plástico. 

-Ye lo que hai. Nun son viajeros, son turistes, bobu.

-Yà, eh. El viajeru ve lo que ve, el turista ve lo que vino a ver.

-Diz que vienen a desconectar y depués quéjense de que nun hai Wifi.

-Y cada añu peor, compañeru. Reprodúcense como gremlins col orbayu.

-Calla, que  una preguntóme si’l “orbayu” ye comestible.

-Y a mi si podía programase.

-¿El qué, ho?

-¡El orbayu, Rufino! ¡Como si fuera una ducha térmica del IKEA!

-Tán perdíos. Sáltame unu: ¿Estos montes tienen “horariu d’encendíu”?

-¡Como si los Picos d’Europa fueren una feria de luces! ¿Oíste?

-Ellos qué saben, bobu, si vienen en chancles a facer rutes de monte. 

-Y hailos repunantes pa comer. Una paisana preguntóme si non podía facese la fabada con menos grasa.

-¿Y qué-y dixisti?

-Digo: Sí, ho. Pero entós yá nun ye fabada, ye tristeza con cuchara.

-Mientres dejen perres… ¡Que marchen coloraos como percebes! 

-Y con diarrea de sidra, que da gloria velos correr al váter del área recreativa.

-Y venga a empeñase n’escanciar. Hasta que s’acojonen, claro. 

-Acaben echándola tan cerca del vasu que paez que tan rellenando’l depósitu del coche.

-Yo vi a unu beber sidra con pajita, Rufino… ¡con pajita!

-Hostia, eso ye peor que comer cachopo con tenedor de postre.

-¡Home va, un crimen contra la humanidá!

-Pos l’el mi pariente ta encantáu.

-¿Entós?

-Punxo’l gallineru en Airbnb y tien lista d’espera hasta ochobre.

-¿En serio?

-Sí, home, sí. Y unes reseñes que flipes.

-¿Cómo ye, ho?

-En plan: “Recomendable. El golor de la pita llégate a l’alma.”

-¡Meca, el mundu ta diéndose a la mierda, Paco!

-Selo yo, Rufino: Vaques influencers, gallineros con spa…

-Y turistes mexando al lau de la cuadra porque piensen que ye esperiencia rural.

-Menuda fauna, compañeru.

-Qu’haya salú.

-Y un bancu pa velos pasar.

-Y pa poder siguir sentándonos a rajar.