Bienvenidos al progreso: pagar más por menos.

-¡Mira qué cola, Mari, paez que vamos entrar al cielu! 

-Yá, eh. Solo falta que venga San Pedro a pedinos el DNI.

-¿Midisti la maleta? ¡Van facenos pagar!

-¿Más tovía, ho? Nin que fuéramos embarcar plutonio.

-Ahora te cobren hasta por respirar nel avión, Celestino. “¿Quier usté oxígeno? Son trés euros el suspiru.”

-Tamos guapos: 40  per cada maleta, extra pol equipaje de mano, por imprimir el billete, por…

-Van acabar poniendo monederu nel cinturón de seguridá, verás: ¡Atención, turbulencias, son venti euros más si usté se quier sujetar!

-¡La puñetera mierdificación, Maricarmen!

-Yá, eh.

-La sociedá avanza, pero para tras. 

-Trátennos como oveyes, Tino. Somos ganáo, pero con WiFi.

-Antes xubíes al avión, dábente’l periódicu y… 

-Y el almuerzu. ¿Alcuérdeste del zumín aquel de naranja aguáu? 

-Home, aquelles bandejines con ensalada de surimi y dos bollinos de pan envueltu en plásticu que sabíen a…

-¡A nada!

-Yá. Saber nun sabíen a nada, pero comíes como un señor. Faciate ilusión.

-Y esi café de máquina que sabía a hosties pero yera gratis.

-Ahora te venden un croissant de plástico y…

-El progresu, bobu: si quies llevar abrigu, 15 euros; si quies mexar, cinco; si quies mirar pela ventana, 7 con 50… El casu ye pagar.

-Hasta por pensar. Si ven que tas usando neurona propia, ¡zas! 

-Y esos asientos que paecen taburetes d’Ikea ensin montar. ¡Que yá ni se reclinan, que casi nin cabemos! 

-A mi l’últimu vuelu a Alicante metióseme un alemán na rótula. ¿Alcuérdeste?

-Sí, ho. Ibamos más apretaos que les morcielles de mi tía Marisa.

-Mierdificación global. Ye lo que hai.

-Cambió tou, boba: la tele, los viajes, internet… ¡Hasta les fiestes de prau!

-Yá, eh. Con tanta tecnología…

-El de los caballítos tien datáfono, el gaiteru te pide un Bizum…

-Yo, si te digo la verdá, nun sé qué vamos  facer a Benidorm.

-¡Selfies, Maricarmen! Conociéndote…

-¡Vaya ho!

-Antes volvíamos morenos y cola barriga llena. 

-Home, y ahora…

-No, Mari, ahora pálidos y con tendinitis nel pulgar de facer semeyes, por tu culpa.

-Nun soi yo, Celestino, ye’l progresu.

-Colo bien que taba yo nel prau coles oveyes, viendo pasar les nubes sin que me cobren por asientu preferente. 

-Anda, calla.

-Ye verdá. Y sin pagar facturación, nin facer cola, nin aguantar a neños llorando nel avión…

-Probes guajes… ¡Los padres, esos son los peores! 

-¿Por?

-Un críu tuvo cinco hores berrando y el padre dicía-y: “Cielo, espresa tus emociones.” ¡Que les esprese, vale, pero non na mi oreya!

-Tamos guapos. Y la cola nun avanza.

-Nin la cola, nin na… ¡Tamos mierdificaos, vamos patrás!¡Tu saca’l  monederu!

-¿Por?

-El sino de los tiempos: pagar más por menos.