El tiempón, boba.

-¿Visti qué tiempón? Yo nun toi preparáu, Joseluis.

-¿Cómo ye, ho?

-Emocionalmente, refiérome.

-¿Por?

-Soi meteorosensible. El mio cuerpu ye un barómetru con pates. Cuando baja la presión, bájenseme los párpados. ¿A ti nun t’afecta? ¿Nun te levantes fatal?

-No.Yo levantome tolos díes igual: con fame y ensin ganes de trabayar. 

-¿En serio?

-Sí, ho. A mi dame igual que llueva, nieve o caigan ranes en tanga.

-Si fai sol, soi un ser de luz. Si llueve, soi un Gremlin.

-Meca. Yo tamién  soi como los gremlins, pero al revés.

-¿Cómo ye, ho?

-Si cai l’agua, en cuenta de multiplicame, éntrame la sed.

-¿La sed? ¿Qué dices?

-Garro cada tarrancha… Tendríen que facer Sidra isotónica pa los díes de nube. 

-Llevo fatal esta primavera. Nun sé nin qué poneme.

-Fai como yo: camiseta interior de les de tola vida, de tirantes.

-¿Pa qué, ho?

-Nun falla. Si fai calor, suda. Si fai fríu, calienta. Tecnología milenaria.

-Esti día salí con camiseta y pantalón curtiu, y acabé metíu nun chigre abrazando la estufa como si fuera mio güela.

-¡Home, nun fastidies! ¡Que somos asturianos, no princeses de Disney!

-Yá, tío, pero esta incertidumbre…

-Ye Asturies, ¿qué quies?

-Ayer salí con  paragües, gafes de sol y bufanda.

-Yá te vi. Paecíes un catálogu ambulante del Decathlon.

-¿Quién? ¿Yo?

-Sí. ¡Yeres la reencarnación asturiana de Mary Poppins en rebaxes!

-¡Anda, calla! ¡Y enriba, esta dichosa borrina!

-Normal. Si vas pela autopista minera y ves más de diez metros, te paran los de Tráficu pa multate por escesu de visibilidá.

-¡Toi fartu! Esta primavera nun sé si salir en tirantes o en neopreno.

-Yo, el otru día, salí en camiseta, pusose a llover, metíme nun chigre y tomé un café. Cuando salí facía sol, tomé un Maxibom. A la media hora taba granizando y pedí un caldu.

-Meca. ¿Y en qué paró?

-En un corte de digestión.

-Normal. Tamos guapos. Tengo l’armariu como la sección de disfraces d’un mercau medieval.

-¿Entós?

-Chubasqueros, bañadores, bufandes, gafes de sol, un anorak reversible y una batamanta por si acasu.

-Miras una app del tiempu y cambia cada cinco minutos.

-Con Alexa yá nun falo, que vaya a la mierda, ¿oíste?  ¿Qué pon el periódicu?

-«Posibilidá d’agües, o no. Y si no, nubes. O sol”

-La madre que los parió…

-Asturies, tierra de microclimas y macrofiestes. 

-Dígotelo yo. Asina ye imposible.

-¿Cómo nun vamos ser meteorosensibles?