No ganamos para sustos.
-¿Ónde coño te metísti, Josinacio? ¿Quies esplicámelo?
-Sí, ho. Nun lo esplica Mazón, voi esplicalo yo…
-Lo que nun se pué ye venir a currar borrachu y con eses pintes.
-¿Qué pintes?
-¿Pero nun te visti nel espejo, carapijo?
-Non.
-Pos mírate, anda.
-Yá lo intenté en casa, y nada. Nun salgo reflejáu.
-¿Cómo ye, ho?
-El capitalismo, Paco. El sistema, tío, ta vampirizándonos.
-Nun me toques los güevos, eh. Que Jalogüi foi va tres días.
-¿Y qué? Cada día da más mieu que l’anterior: les noticies, les factures, los políticos…
-¿Cómo ye, ho?
-La realidá ye una película de terror.
-Calla, ho.
-Anueche vi l’informativu y tuvi que dormir con un crucifijo y una mantina eléctrica.
-¿Quies quitar esi disfraz y ponete a currar?
-Nun puedo. Soi un muertu viviente que cotiza a la Seguridá Social.
-¿A quién quies asustar?
-Yo a nadie. El Terror cotidiano ye’l preciu de la vivienda, la precariedá social.
-Anda, pásame la llave del doce antes de que te clave una estaca, oveya.
-La estaca yá me la clavó Hacienda.
-Hai que saber mexalo, Josinacio. Tu nun yes de tresnochar.
-Lo guapo de ser vampiro ye trabayar de nueche y nun pagar luz.
-Anda, pásame la cinta americana.
-¿Cuál? ¿“Pesadilla en Elm Street”? ¿“La noche de los muertos vivientes”?
-Verás qué hostia.
-¿Eh?
-La mi paciencia tien un límite, Josín. Toi empezando a enfadame.
-¿Y si das-y una vuelta?
-¿A la rueda?
-Al taller, Paco. ¡Síamos un taller de ultratumba!
-¿Qué, ho?
-¿Non te das cuenta? ¡Vivimos arrodiaos de zombis!
-Sobremanera yo.
-Xente colos güeyos pegaos al móvil, arrastrando los pies, sin hablar con nadie…
-Ye lo que hai.
-…Chupándonos la sangre unos a otros…
-Selo yo.
-El preciu del aceite peles nubes, los sueldos pol sosuelu, y los coches eléctricos viniendo a quitar el trabayu…
-Tú lo que quiés ye jubilate, zamarro.
-Yo nun me jubilo, yo me desintegro.
-Voi desintegrate yo d’una hostia, verás.
-Un día voi apaecer en forma de fumu pol tubu d’escape d’un coche híbridu.
-¡Dame paciencia, Señor! ¡Nun gana unu pa sustos, cagonrós!
