Dudas alimentarias.
-Julián, por favor…
-¿Qué ye, ho?
-Nun ye necesario leer les etiquetes de tolos yogures.
-Yá, pero…
-¡Venga, ho! Que paez qu’estes faciendo una tesis doctoral sobre los lácteos.
-Oi, unu tien derechu a saber lo que se mete nel cuerpu.
-Lo tuyo ye por demás, guapín.
-¿El bífidus activu, quién ye, un gladiador romanu?
-¡Déjate de pijadas y espabila!
-“Sin azúcares añadidos”. Esto ye, que yá venía con azúcar de casa.
-¡Julián! Llevamos trés cuartos d’hora en esti puñeteru pasillo.
-Espera un poco, muyer.
-¡Hasta’l pan va ponese duru d’esperar!
-Leer etiquetes, vida, ye como esquivar minas.
-¿Qué dices?
-Un descuidu y lleves a casa un ultra procesáu con más grasa qu’un taller mecánicu.
-¡Buo! Si leyeras les factures cola misma pasión que les etiquetes…
-Si nun metieren 200 aditivos en tou, yo nun tendría que leer tanto…
-¡Tu nun leísti tanto nin cuando firmaste la nuestra hipoteca!
-La hipoteca nun prometía “sabores irresistibles con colores vibrantes”, nin “contenido en grasas refinadas”…
-¡Vale yá, Julián! Ayúdame a tirar del carru.
-¡Toi velando por la nuestra salú, Marga! Mira: sodio, grasas saturadas…
-Ni que fueras a dar una charra nel HUCA.
-Esti zumo diz “natural”, pero tien un 0,7% de fruta. ¡0,7%!
-¿Y qué más da?
-Hai más fruta nuna gominola, no me fastidies.
-Julián, tiénesme hasta les narices.
-Si el gobierno pusiera límites a los azúcares…
-Si tu pusieras límites a tu curiosidad…
-Alguien tien que vigilar lo que comemos.
-¡Sí, ho! el CSI del Mercadona. Anda, tira…
-Marga, tu y yo somos como la industria y la administración.
-¿Cómo ye, ho?
-Tu aprietas p’avanzar y yo intento poner control.
-Lo que me tas poniendo ye d’una mala hostia…
-¿Sabíes qu’esti yogur “light” tien más caloríes qu’un donut?
-¿Y qué facemos, Ju? ¿Nun llenamos el carrín?
-Sí. De dudas nutricionales.
-Na. Así ye imposible venir a la compra contigo.
-¿Por qué? ¿Qué ye lo que quies?
-¡Cenar antes del amanecer, maniáticu!
-Reconoz que gracies a mi comemos mejor.
-No, gracies a ti comemos menos. Pásasenos la fame leyendo etiquetes.
-Bueno, algo ye algo. Yo leo los ingredientes.
-Y yo me alimento de remordimientos.
-Depués, cenamos los dos juntos. ¡Y tan contentos!
