Palabras mayores.

-¿Qué le pongo, Joseluis?  

-Tú nada, voi poner yo.

-¿Qué?

-Una reclamación. 

-¿Cómo ye, ho?

-¡Táis discriminando a los veteranos!

-¿Quién? ¿Yo?

-¡El edadismo de los cojones!

-Hable usté bien, Joseluis.

-Esto ye una verguenza.

-¿Pero qué pasó?

-Yo nesta playa nun yera unu más, yera’l rompecorazones oficial. 

-Home, vaaa…

-Yo fui mitu eróticu en Verdicio seis años consecutivos. ¡Cuidao!

-¡Ai amigu…!

-Nes verbenas de prau yo nun bailaba, yo impartía clases magistrales d’agarráo. 

-Yá, yá.

-Yo fui’l George Clooney de Candás y agora toi más abandonáu que la ciudá de Perlora.

-Pos ta usté bién pa la so edá.

-¿Ves? ¡Yá tamos faltando! ¡Cagonmimacho…!

-Pero, oiga…

-¿Qué oiga ni qué mi madre? ¡Que llevo parando equí más de trenta años, cuquina, que soi un incondicional del branu!

-Yá, home, pero…

-¡Que yo equí tuvi munches tardes de gloria! ¿Oíste?

-Selo yo, Josín, selo yo.

-¡Que tengo salío muches nueches pela puerta grande! ¿Ye verdá o non?

-Que sí, ho.

-Y agora, cagonmimacho, llevo casi dos meses viniendo a esti chiringu, y nenguna muyer me diz ni “hola guapu”, ni qué tal, ni na. 

-Bueno, home…

-¡Ye que nin me miren! ¿oíste? 

-Non ye que nun lu miren, Joseluis. Ye que nun lu ven.

-¿Por?

-Van a lo suyo. Nun ye usté lo suficientemente “cool” pa…

-¿Qué cool ni que mi madre? Una gracia, un guiñu, una sonrisina, qué sé yo.

-La mocedá nun levanta la vista del móvil, Joseluis. ¿Qué quier que-y digan?

-Algo, coime. Yá nun te digo un “te deseo, Joseluis”, pero un “enguapiasti, Josín” o “¡qué bien te queda’l bigotín!”…

-¡Jajaja!

-Non te rías, ye una conspiración global: playes, chiringos, redes sociales…

-¿Qué, ho?

-¡Ta’l mundu entamáu pa que los mayores tengamos que ver abdominales de ventiañeros sin piedá!  ¿Y los maduritos qué, ho?

-Relájese, Joseluis.

-Yo toi pa dalo, pero hai que dame una oportunidá. ¡Yá non me piden nin fueu!

-Porque la xente yá nun fuma, son otros tiempos.

-Yo rompía corazones fumando “Fortuna mentolao”. ¡Cuidao, eh, cuidao!

-¿Qué le pongo, Joseluis? 

-Nada, ho. Voi ponela yo. ¡Aqui tienes la reclamación!