El efecto “Kiss cam” tensa las noches del verano asturiano.

 

-Tate quieta, Marijose.

-¿Qué ye, ho?

-La cámara, ¿nun la ves? ¡La kiss cam, que vien, que vien pacá…!

-¿Que qué, ho?

-¡La kiss cam, vien por nós! Va pasanos como al CEO esi…

-¡Tranqui, Ferino! ¡Qu’esto non ye Coldplay! ¡Tamos nun concursu de tonada!

-¿Tu ves esa cámara? ¡Esa nun busca folclor, esa busca besos!

-¡Nun sías bobu, dame un piquín!

-Van pillanos, Mari, y vamos salir en TPA, como’l propiu nome indica.

-¿Qué, ho?

-TPA: Tele para Adúlteros.

-Nun sías bobu, dame un picu, ¿quién nos va a ver?

-La mi muyer. ¡“El Picu” velu siempre la mi muyer!

-Cara risa, que se vea que somos  amantes…

-¿Pero qué dices, Marijose?

-…De la tonada. Amantes de la tonada, Ferino.  Tan cantando ‘Viva la xente minera’ y tú con esa cara de fedor…

-Tamos hipervigilaos, Mari, vienen a por nós.

-Mmmmm…

-¡Para, Mari, que yo tengo una hipoteca y dos perrinos en casa que me güelen la culpa desque cruzo la puerta!

-Meca, churri, tas sudando como un gochu.

-¿Y el to marido qué?

-Na, él non ye de sudar.

-¿Y si nos ve? Disimula, né. ¿Qué quies, facete viral?

-El mi marido ta a lo suyo, con tanta verbena y tantes fiestes…

-Aparta un poco, Marijose, que tamos dando que hablar.

-Mmmmm… Cuando canten  ‘Puente de Ribesella’ marchamos, ¿vale?

-¡Ponte pallá, Mari! 

-Jobar, churri, tienes más mieu que vergüenza.

-¡Uf! Cada vez que alguien tose, pienso que ye la mi muyer.

-¿Pero nun ta pa Valencia de Don Juan?

-¡Sí, pero…!¡Ahí vien! ¡Ahí vien! ¿Ves?

-¿Quién?

-La cámara, Mari. ¡La kiss cam! ¡Suelta, ho!

-¡No te flipes, Ferino, que yá me tas agobiando!

-Enfoquen al gaiteru, depués a unos vieyos… y de sópitu ¡ZAS! ¡La pareja sospechosa d’amor prohibíu!

-Tamos nun concursu de tonada, non n’una operación d’espionaje. 

-¡Ponte pallá, Marijose!

-Y si nos damos un picu, qué más da. Somos compañeros del coro.

-Sí, ho. Y la mi mujer va a corame a mi.

-Pos habelo pensao antes, guapín.

-Home, yo pensé qu’equí ente’l mogollón pasaríamos desapercibíos pero…

-¿Nun queríes emociones fuertes, Ferino? 

-¡Uf! ¿Tu crees que Dios castiga con kiss cams?

-Meca, esi canta como si tuviera una oveya atrapada nel gargüelu.

-¡El cante lu tamos dando nosotros, Marijose!

-¡Ai fíu, qué muermu yes! Tantu morbo y tantu tirame los trastos pa nada.

-¡La puñetera kiss cam!

-¡Que solo ta na to cabeza, bobón!

-Yá, yá, ¿pero y si vien?

-Nun pasa nada. Somos amantes… de la tonada.