Batallas cotidianas de buena mañana.
-¡Fai la cama, Tino!
-Paso.
-¿Cómo ye, ho?
-Agora non. Depués…
-Lo de siempre: tas esperando a que la faiga yo.
-Non, señor. Nun puedo.
-¿Por?
-Ye antihigiénico.
-¿Que qué, ho?
-Tenemos un millón y mediu de bichos na cama. ¡Hai que ventilar l’habitación!
-Los bichos tán na cuadra, Celestino.
-¡Ácaros, Mariluz! Son lo peor…
-¡Tu si que yes lo peor!
-Se alimentan en silenciu pela nueche…
-Igual que tu. ¿O crees que nun t’escucho abrir la nevera?
-¿Vas comparar un paisanu con un ácaru?
-L’ácaru polo menos nun pregunta: ¿qué hai de comer?
-Si dejamos la cama sin facer, Mari, los ácaros se deshidratan.
-Pos faila, venga, les cogí cariño.
-¿Qué dices?
-Tantu tiempu compartiendo colchón que yá me llamen “la vecina de baxo”.
-Déjate de pijaes, Mariluz.
-¡Fai la cama d’una puñetera vez!
-Los ácaros son bien chungos, vida. Se alimenten de la nuestra piel.
-¡Manda güevos, Celestino! Lleves venti años buscando escuses pa nun estirar una sábana.
-Nun ye una escusa, ye ciencia. Investigación d’espertos.
-¿Y esos espertos tán casaos?
-¿Qué sé yo, Mari?
-Si llega cualquiera a casa y ve esta cama…
-Viven un mes y ponen cien güevos. Cada unu, Mari. Uf, los ácaros…
-Mira, Tino, ente los ácaros y el putu mosquitu, que parez un D.J…
-¿Un qué, ho?
-Pincha na mio oreya a les trés de la mañana. ¡Y zumba, pa enriba!
-Tranqui, vida. Si nun faigo la cama, se piran los insectos.
-¿Quies facer la cama d’una puñetera vez?
-¿Pa qué? Si la fago yo, vas facela tu dempués.
-¡Porque la faes mal!
-Eso ye subjetivo.
-Eso ye evidente.
-¿Entós pa qué quies que la faiga?
-¡Pa que aprendas d’una vez!
-¿Pero nun ves que los ácaros tán ahí, en su salsa, col polvu qu’hai en casa?
-¿Polvu? Mira, ricu, nun me saques el tema, que llevamos una temporada…
-¿Qué ye?
-Follamos menos que los pandas en cautividá. ¡Fai la cama, Tino!
-Agora non. Depués…
-Lo de siempre, castrón: tas esperando a que la faiga yo.
