Esos locos bajitos.

-¿Presión académica? ¡Si tienes nueve años!

-¿Y por qué la mochila pesa tantu?

-Porque lleves llibros.

-Nun preciso lleer, voi ser influencer y creador de conteníos.

-¡Tienes qu’estudiar, Enol, que’l futuru ye tuyu!

-Pos pienso devolvelo, porque ta defectuosu.

-¿Pero non te das cuenta? ¡El cole abre puertes!

-Sí, ho. A trabayos de mierda.

-A ver, Enol. Yo estudié, toi trabayando, y gano dinero.

-Ganes cuatro perres y nun tienes nin tiempu pa gastar.

-Yá. Pero…

-Ye como coleccionar cromos y nun abrir nunca’l sobre.

-Tienes qu’estudiar, Enol, como estudiamos tu ma y yo.

-Si estudiastis, ¿por qué lo facéis tou tan mal?

-Facemos lo que podemos, fíu. 

-¿Y por qué táis siempre tan amargaos?

-Nun tamos amargaos, fíu, lo nueso ye cara de preocupación. 

-¿Y qué culpa tengo yo?

-Nenguna, fíu. Lo que tienes que facer ye estudiar. La educación ye poder.

-Entós, ¿por qué manda siempre el más fatu?

-Si estudies, puedes  cambiar el mundo.

-¡Que lu cambien los adultos, que pa eso lu rompieron! ¿Por qué asesinen a diariu a neñes y neños? ¿Por qué hai tantes guerres y… ?

-Nun sé qué dicite, fíu.

-¿De qué sirve aprender raices cuadraes si depués se permite un xenocidiu?

-Nel cole tán los tos amigos, Enol. ¿Non los quies ver?

-Sí. Pero puedo velos nel recreo. 

-Primero clase, depués recreo.

-¡Jobar! O sea, que pa ganame venti minutos de xuegu tengo que pagar con cinco hores de llingua y mates. ¡Ye’l peor negociu de la hestoria!

-Vuelta al cole, Enolín, ye lo que toca. 

-¡Qué galbana!

-La rutina ye bona. Date seguridá, estructura, orden…

-A mi lo que me da ye suañu. 

-Vaya, ho.

-¿Por qué tengo que madrugar tantu? ¡Yo soi un neñu, non un gallu!

-Tienes que formate, Enol, aprender coses útiles.

-Si por lo menos enseñárenme a hackear el wifi…

-Algunes coses ameyoren col tiempu, Enol.

-Sí, ho. ¡Los videojuegos! Lo demás teneislo en pausa, eh.

-Si estudies, Enol, vas poder ser médicu, inxenieru, astronauta…

-¿Y evitar que daquién dispare un misil? ¿Eso van enseñar?

 -Qué sé yo, fíu… A ver…

-El problema nun ye que los neños vaigamos al cole. El problema ye que los adultos olvidáronse d’aprender.