Cachopos con suspense.
-¡Mecagonla…!
-Tranquilu, ho.
-¡El putu páxaru!
-Hai que tar más atentu.
-Cagonchús, pillome descuidau.
-¿Pero nun alvirtió’l so vuelu apavoriante?
-¿Qué, ho? Si miro al cachopu nun miro al páxaru…
-Elles suelen practicar el vuelu rasante en terraza. ¿Nun la vio facer antes una picada?
-Sí, coño, pero nun pensé que quería picar nada.
-Tamos en guerra, culpa nuesa. Esto ye un polvorín.
-¿Culpa de quién?
-Más concienciación y menos control.
-¿Cómo ye, ho?
-Tamos acosándoles. Retirando güevos, niales, pollos…
-¿Qué pollu nin que…? ¡Acaba de llevame’l mio cachopu!
-Normal. Tamos agobiándoles.
-¿Quién, ho?
-Sí. Hai que protexer la colonia…
-Qué tien que ver.
-…De gaviotes, refiérome. Cada vez nos queden menos.
-Yo soi de Heno de Pravia. Na suya nun me meto.
-Debemos de tener tactu, compañeru, nun provocar.
-¿Provocar yo?
-Si non, vuélvense agresives. Respetemos a los plumíferos.
-¡Home, va! ¡Merqué un par d’ellos en Primark!
-Solo intenten sobrevivir nun hábitat invadíu por nós.
-¿Cómo ye, ho?
-¿Nun foi usté güei a la playa?
-Sí.
-Ah. ¿Y por qué nun van venir elles a la terraza?
-¿Pero usté qué quier, tocame los coyones?
-Pa nada.
-¡Pos déxeme en paz, que bastante tengo con esi puñeteru bichu patiamarillu!
-Yá tamos sacando defectos…
-¿Que qué, ho?
-Ye mui cómodu criticar, cria-yos mala fama, ponelas a parir…
-Que vaigan al vertideru, coño, tienen buffet llibre.
-Cada vez lo tienen más difícil. Esa ave igual fixo’l so nial na iglesia…
-¿Qué ye, l’Ave María?
-Déxese de babayaes. Ye usté más brutu qu’un fervinchu de pan arralláu.
-¿Pero, tío, nun tas viendo que me marchó col cachopu?
-Home, la cosa tien gracia…
-Sí, ho. Tou ye graciosu con tal que-y pase a otra persona.
-Probes. tán en declive, al ser desplazaos del so hábitat…
-Tamién toi yo desplazau, que vengo de Tinéu.
-¿Tan cafiante ye veles revolotear?
-Tu yes faltosu, chaval.
-Sin faltar, eh. Qu’haya vida intelixente en terraza.
-La intelixencia ye un procesu cíclicu.
-¿Qué?
-Cuando pases de llistu vuelves ser tontu.
-¿Qué?
-¡Camarero! ¡Quiero’l mio cachopu!
