Sofocos a pie de urna.
-¿Y esa pinta, Ramón?
-¿Qué ye, ho?
-Sudes más qu’un testigu falsu.
-¡Buo, nun me hables! ¿Fai calor en toles partes o solo nes míes?
-Yes tu, que tas encendíu.
-¿Yo?
-Sí, dio nubes y claros, Mon. Y tan baxando les temperatures.
-Será pa ti. Yo toi bien caliente.
-¿Entós?
-Tamos na cuenta trás, Arsenio.
-Na, una selmana namás.
-Esperemos, ¿oíste?
-Coime, el domingo ye cuando…
-Yá, yá. Pero non vaya a ser que reculemos años, munchos años…
-Calla, home, nun lo quiero nin pensar.
-Pos yo toi más caliente qu’un tobogán.
-Tu tranquilu, Ramón. Dempués de cocíu mengua, ¿oíste?
-Puf. Nun sé yo…
-El casu ye dir a votar.
-Qué quies que te diga, Arsenio, miro les encuestes y rompo a sudar.
-¡Calla, ho!
-Nin pego güeyu, nin me concentro.
-¡Meeeee!
-Antes vía trés películes nuna nueche y agora preciso trés nueches pa ver una película.
-Ai, Ramonín, la edá nun perdona.
-Nun me concentro, Senio.
-Relájate, ho.
-Imaxínate agora empezar a recular, perder derechos…
-Na.
-…La censura, dir culu tras…
-Na, na. Yo yá toi nello.
-¿Cómo ye, ho?
-Sí, sí. Últimamente solo veo’l video de la mi boda pero marcha tras.
-¿Marcha tras?
-Sí, ho. Y si ves qué emoción.
-¿Emoción?
-Sobre too cuando-y quito l’anillo, salgo de la iglesia y me piro. Un subidón.
-¡La madre que te sibló!
-Ye la ventaja de ser inteligente, Ramón.
-¿Qué, ho?
-Que se pué fingir ser imbécil, pero al revés ye imposible.
-Yes un casu, Arsenio. Pos yo opino…
-Me la suda.
-¿El calor?
-Non, la to opinión. Tuvi viendo un par de debates y nun quiero discutir con naide.
-¿Por?
-Porque yo discutilo conmigo y al final yera como yo dicía.
-Meca, yo nun paro de sudar. Puf, que nun nos pase na.
