El efecto embellecedor.
-¡Mira qué guapu, Nely, qué pibón!
-Yá tamos…
-¿Qué ye, ho?
-Les gafes de sidra.
-¿Eh?
-L’efectu embellecedor.
-¿Que qué, ho?
-¡Dexa de chumar, Mariflor!
-¡Ai, dase un aire a Brad Pitt, nun me digas que non!
-¡Calla por Dios, que siempres tas igual!
-¿Yo?
-Sí, fia. Con trés culinos el chigreru tien los llabios más carnosos, los güeyos más grandes y la de la mio madre…
-¿Pero tu vistilu bien, ho? ¡Mira, Nely, qué pibón!
-Calla la boca, Mari, faime’l favor.
-Uf. ¡Yo me lo fo…! ¡Me lo fo…! ¿Y tú? ¡Di la verdá!
-¿El qué, ho?
-¿Te lo follabas o non?
-¿Yo? Nin lloca. ¡Ye feu pa perru! Si nun llevares les gafes de sidra…
-¿Que qué, ho?
-Date por simetrizar les cares, Mari, te paecen más atractives de lo que son.
-¡Uf, mira, ho! ¡Esi rapaz tien un revolcón!
-Bebes tantos culetes, cuca, que nin la proporción áurea respetes.
-¿La qué, ho?
-La sidra vuelve más bella a la xente, Mari, actúa como simetrizador.
-¿Cómo ye, ho?
-Bebes y bebes, y muévesete tou: la distancia ente los güeyos, la boca…
-¡Ta pa da-y, Nely! ¡Ta pa da-y!
-¡Anda, nun bebas más! Esi paisano ye feu como un rayu. ¡Vamos pa casa!
-¡Toi más caliente qu’un pelotazu na oreya!
-Claro. L’efectu “gafes de sidra” aumenta la libido y tu, Flori, tas pa la mano.
-¿Cómo ye, ho?
-¡Que vinisti a pillar, Mariflor, les coses como son!
-¿Yo? ¡Sí, ho! Lo que te da rabiona ye qu’él solo tien güeyos pa mi.
-Él ta a la que salta, Mari. ¡Ye un xostrón!
-¡Buo, qué mala ye la envidia, por favor!
-¿Envidia de qué, ho?
-Nun tengo culpa de ser más guapa y más sexy que tu, fía.
-Mira, Mariflor, nun te lo voi tener en cuenta porque sé de sobra que l’efectu “gafes de sidra” funciona de forma bidireccional.
-¿Cómo ye, ho?
-Non solo ameyora la percepción del atractivo de los demás, sinón que tamién te fai sentir más atractiva a ti mesma.
-¡Qué pesadina yes, fía!
-Pos anda que tú…
-¿Quién me diba a dicir a mi que diba atopar a esti pibón nel chigre de la comisión?
-Tienes tú más peligru nes fiestes de prau, Mari, que dos caníbales faciendo’l 69.
-¡Calla la boca, repipi! ¡Mira qué guapu, qué pibón!
-Son les gafes de sidra, Mariflor. L’efectu embellecedor.
