Vecinos cantarinos.
-¡Nanana… nanana… ninonaaaa… nanani..!
-¡Vale yá! ¡Por favor, yá ta bien!
-¿Cómo diz?
-¡Que vale yá!
-¿Eh?
-Ta usté llevando al vecinderu a la máxima tensión.
-¿Quién? ¿Yo?
-Sí. Lleva usté tola mañana tarareando en bucle esa mierda de villancicu.
-A mi la música trespórtame a otros llugares.
-Y a mi tamién. Nun restorán punxeron reguetón y me piré.
-¿Cómo diz?
-¡Buo! ¡Qu’agobiu me ta entrando!
-Vaya, ho. ¿Tien usté mieu a los espacios zarraos?
-Sí, cuando voi al chigre tengo mieu de que tea zarráu. Pero…
-¡Con mi burrito sabanero nananana, ninonaaaa..!
-Y dale. ¡Ye usté más pesáu qu’unes zapatielles de cementu!
-¡Nananaaa! ¡Si me ven, si me ven, nananinaaaa…!
-¿Pero a quién se-y ocurre propagar villancicos a primeros de payares?
-Mediaos, eh.
-¿Y qué? ¿A usté paez-y normal, en plenu branín de San Martín ponese a tararear el burrín sabaneru?
-Tararear me calma.
-Pos a mi ta poniéndome de los nervios. ¡Dexe yá d’encrespar!
-Me alivia el estrés y báxame los picos.
-¿Qué picos?
-Los picos d’ansiedá. Con mi burrito sabanero voi…
-¡Vayase a la mierda, home! Ta faciendolo adrede.
-¿El qué, ho?
-De forma consciente, pa torturame.
-Que non, en serio, la música ayúdame a relaxame. Porque llevo un día..
-¿Y los demás? Como si non tuvieramos que cargar coles nueses movides pa enriba tener qu’aguantar…
-¡Pos haber xubio andando!
-¡Faltosu!
-¿Quier usté dexar d’obsesionase conmigo?
-Nun puedo, coño. Porque usté a mi quítame’l suañu.
-¿Yo?
-Sí. Col putu taladru toles mañanes y agora vien taladrar les mios oidos con…
-¡Soi un vecín exemplar!
-Qué va. Un vecín exemplar ye’l que nun-y pon contraseña al wifi.
-¡Nananana…! ¡Con mi burrito sabaneroooo!
-Ta usté propagando villancicos chungos que se tresmiten como una enfermedá infeiciosa.
-Al contrario. La música ye curativa.
-¡Home, vaaa!
-Tararear ayúdame a conectar la mente, el cuerpu y l’espíritu.
-¿El qué, ho?
-L’espíritu navidiegu, vecín.
-¡Sí, ho! ¡Tamos guapos! Nun ganamos pa crispación… En casa, na cai…
-¡Nananaaaa, nananaaa…!
-…Hasta nel ascensor.
