La cola emocional.

-¡Oiga!

-¿Eh?

-Que se coló.

-¿Quién? ¿Yo?

-Sí. Ehí taba yo.

-¿Cómo?

-Que taba yo.

-¿Cuándo?

-Antes, agora mesmu.

-Non, non, agora toi yo.

-Claro, porque usté colóseme.

-¿Quién? ¿Yo?

-Sí, acábase usté de colar, púnxose usté nel mio llugar.

-Yá, yá.

-¿Cómo que yá yá? ¡Tien usté muncho morru!

-Non, señora. ¡Empatía!

-¿Que qué, ho?

-Lo que tengo ye empatía.

-¿Eh?

-Yo sé poneme nel so llugar. Y puntu.

-Pero…

-Intento ver les coses dende’l so puntu de vista, asina que pare yá cola manina.

-¿La qué?

-Que dexe de tocame’l hombru, coño. Un poco de respetu, faiga’l favor.

-Pero usté colóse.

-Y dale.

-¿Pero cómo tien usté tanto morru?

-¿Yo? Ye increíble.

-Eso digo yo.

-Ta una tratando d’ayudar, de meteme nel so mundu emocional…

-¿Nel mio qué, ho?

-..Y usté da-y que te pego cola manina, venga a tocame’l hombru…

-Ye qu’usté se coló, póngase nel mio llugar.

-Eso toi faciendo, fía, que paeces boba.

-¿Yo?

-¡Ai Dios! La empatía ye como la intelixencia, a quien-y falta nin se da cuenta.

-Pero, vamos ver, escuche…

-Sé escuchar, muyer, y entiendo cómo se siente. 

-¿Entiendelo?

-Claro. Una solo precisa que la escuchen, que la quieran, que la abracen… 

-¿Pero por qué nun intenta ver les coses dende’l mio puntu de vista?

-¡Pa eso me punxi equí, señora!

-¿Pa eso?

-Claro. Dende un pocu más tras yá nun se ve igual. ¿A qué non?

-Non.

-¿Ves?

-Pero usté colóseme y yo…

-Y dale.

-Oiga, ye usté una elementa de munchu cuidao.

-¿Yo? Hai que cultivar más la empatía, muyer. Y pare yá cola manina, cojona.

-¿Pero nun ve que tengo prisa?

-Paciencia, fía. Al final, les bones persones reciben grandes amores.

-Sí, ho. Pero usté colóseme y yo…